पाल्पा– जिल्ला अस्पताल पाल्पा र लुम्बिनी मेडिकल कलेज तानसेनको आइसोलेसनमा उपचाररत तीनजना बिरामीको स्वाब परीक्षणका लागि प्रदेश जनस्वास्थ्य प्रयोगशाला बुटवल पठाइएको छ । तीनैजनामा कोभिड– १९ को लक्षण देखिएकाले परीक्षणका लागि स्वाब पठाइएको अस्पताल प्रशासनले जनाएका छन् ।
तीनजनामा बगनासकाली गाउँपालिकाका २० वर्षीय एक पुरुष र माथागढी गाउँपालिका– २ झडेवाका दुईजना छन् । २० वर्षीय पुरुषको स्वाब उनको घरबाटै संकलन गरिएको हो । जनप्रतिनिधि र अस्पतालका प्रमुख डा. पुष्प ज्ञवालीले घरमै पुगेर उनलाई जाँचेका थिए ।
हाल उनलाई अस्पतालको आइसोलेसनमा राखी उपचार भइरहेको छ । १० चैतमा भारतको मुम्बैबाट आएका उनमा उच्च ज्वरो देखिएको छ । लुम्बिनी मेडिकल कलेजमा उपचाररतमा पनि उच्च ज्वरो र रुघाखोकी नियन्त्रणमा आएको छैन । दुवैजनाले विदेशीहरू आवतजावत गर्ने एक होटेलमा काम गरेकाले संक्रमणको आशंका गरी परीक्षणमा पठाइएको कलेजका निर्देशक डा. राजु शाक्यले बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।