कोरोना संक्रमणको आशंकामा स्वाब परीक्षण गरिएका अछामका पाँचैजनामा कोरोना नभएको पुष्टि भएको छ । 

न्याय हेल्थ नेपाल बयलपाटाका अनुसार दुई स्वास्थ्यकर्मीसहित अन्य तीनजनामा कोरोनाको जस्तै लक्षण देखिएपछि उनीहरूलाई निगरानीमा राखेर स्वाब संकलन गरी परीक्षणका लागि पठाइएको थियो । उनीहरूमध्ये तीनजनालाई आइसोलेसनमा राखिएको थियो भने दुईजना स्वास्थ्यकर्मीलाई छुट्टै निगरानीमा राखिएको थियो ।

परीक्षणका लागि गत शुक्रबार स्वाबको नमुना पठाइएकोमा तीन दिनपछि सेती प्रादेशिक अस्पताल धनगढीले उनीहरूमा कोरोना नदेखिएको रिपोर्ट दिएको हो । स्वास्थ्य कार्यालय अछामका प्रमुख झनकराज ढुंगानाका अनुसार उनीहरूमा ज्वरो, रुघाखोकी र श्वास–प्रश्वासको समस्या देखिएको थियो । उनीहरूमध्ये तीनजना जिल्लाबाहिरबाट आएका थिए ।