काठमाडौं– कोरोनाभाइरस महामारीसँग जुध्नका लागि अहिले विश्व आफूलाई तयार पारिरहेको छ । यो महामारी फैलिएपछि विश्वभर भेन्टिलेटरको अभाव खड्किएको छ ।
नेपालमा पनि कोरोनाभाइरस संक्रमण रोकथामका लागि विभिन्न प्रयास भएका छन् । सरकारले विभिन्न देशबाट स्वास्थ्य सामाग्री किन्ने प्रक्रियामा छ । कोभिड १९ संक्रमण भएमा यसको उपचारका लागि अति आवश्यक भेन्टिलेटर चाहिँ नेपालमा पनि कमी छ । केही अघि आएको तथ्यांकअनुसार नेपालमा अहिले एक हजारभन्दा कम भेन्टिलेटर प्रयोगमा आउने अवस्थामा रहेका छन् ।
यहीबीच महावीर पुनले राष्ट्रिय आविष्कार केन्द्रमा इमर्जेन्सी भेन्टिलेटर तयार पारेका छन् । उनले यसको जानकारी स्वयं ट्विटरमा दिएका छन् ।
पुनले भेन्टिलेटरसँगै एरोसोल बक्स पनि तयार भएको बताएका छन् । एरोसोल बक्सको सहयोगमा बिरामीको उपचार गर्न चिकित्सकले बिरामीको सम्पर्कमा आउनु पर्दैन । पछिल्लो समय दक्षिण कोरियामा कोभिड १९ संक्रमण भएको वा नभएको भन्ने थाहा पाउन यो विधि प्रयोग गरिएको थियो ।
पुनले ट्विटरमा नै वीर अस्पताल, ट्रमा सेन्टर, टिचिङ अस्पताल, गंगालाल अस्पताल तथा सैनिक अस्पताल छाउनीमा बिग्रिएका भेन्टिलेटर पनि मर्मत कार्य सुरु भएको जानकारी दिएका छन् ।
कोरोनाको सिकिस्त बिरामीहरुको उपचारको लागी आबश्यक दुई ओटा नयाँ चिजहरु आविष्कार केन्द्रमा तयार भयो.
— Mahabir Pun (@MahabirPun) April 11, 2020
१. एरोसोल बक्स
२. इमर्जेन्सी भेन्टिलेटर
३. साथै बीर, ट्रमा सेन्टर, टिचिंग, गंगालाल अस्पताल र सैनिक अस्पताल छाउनीमा भएका बिग्रेका भेन्टिलेटरहरु मर्मत गर्ने काम पनि धमाधम हुँदैछ. pic.twitter.com/XmBPCPm5nV
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
