काठमाडौं– कोरोना भाइरस संक्रमण पहिचानका लागि ५२ जिल्लामा र्यापिड टेस्ट किटबाट परीक्षण सुरु भएको छ । स्वास्थ्य तथा जनसंख्या मन्त्रालयले ५२ जिल्लामा र्यापिड टेस्ट किटबाट परीक्षण सुरु भइसकेको जनाएको छ । 

स्वास्थ्य मन्त्रालयले सोमबार पत्रकार सम्मेलन गर्दै पिसिआर मेसिनबाट हालसम्म देशैभर पाँच हजार ६ सय ९१ जनाको कोरोना भाइरस परीक्षण गरिएको जनाएको छ । मन्त्रालयका प्रवक्ता डा. विकास देवकोटाका अनुसार देशभर हालसम्म सात हजार १६६ जना क्वारेन्टाइनमा छन् ।’ 

‘देशैभरका आइसोलेसनमा १०३ जना छन्, उनले भने, ‘जसमा उपत्यकाबाहिर ९४ जना र उपत्यकाभित्र ९ जना छन् ।’ शनिबार कोरोना संक्रमण देखिएका ३ जनाका सम्पर्कमा आएका २८ जनालाई कोरोना भाइरसको परीक्षण भइरहेको छ ।

मन्त्रालयका अनुसार हालससम्म र्‍यापिड टेस्ट किट र पिसिआर विधिबाट कोरोना भाइरसको आशंकामा १० हजार ९ सय ८२ वटा टेस्ट भइसकेको छ । नेपालमा हालसम्म १४ जनामा कोरोना संक्रमण देखिएको मन्त्रालयले जनाएको छ ।