काठमाडौं– उदयपुरको भुल्केमा मस्जिदमा रहेका व्यक्तिहरुबाट कोरोना फैलिएपछि सरकारले काठमाडौँस्थित मस्जिदमा रहेका सबैको कोरोना भाइरस परीक्षण सुरु गरेको छ । 

स्वास्थ्य विभागका महानिर्देशक महेन्द्रप्रसाद श्रेष्ठले काठमाडौंस्थित मस्जिदमा रहेका सबैको परीक्षण सुरु गरिएको जानकारी दिएका हुन् ।

बिहीबारदेखि सुरु गरिएको पिसिआर परीक्षण शुक्रबार पनि जारी रह्यो । श्रेष्ठका अनुसार बिहीबार ७६ जनामा परीक्षण गरिएको र बाँकीको आज पनि भइरहेको छ । 

उदयपुरको भुल्केस्थित मस्जिदमा २७ जनामा कोभिड संक्रमण देखिएको थियो । तीनजना काठमाडौं गएको देखिएका कारण काठमाडौंमा रहेका सबैको परीक्षण गरिएको महानिर्देशक श्रेष्ठले जानकारी दिए ।