काठमाडौं– समाजवादी पार्टीका नेता तथा पूर्वराज्यमन्त्री डा. सुरेन्द्र यादवले आफूलाई सांसद महेश बस्नेत र किसान श्रेष्ठ र पूर्वआइजिपी सवेन्द्र खनालले अपहरण गरेको भन्दै जाहेरी दिन जनता समाजवादीका पार्टी (जसपा)का नेताहरुसँगै सरकारी वकिलको कार्यालय, काठमाडौं पुगेका छन् । तर, त्यहाँ पनि उनीहरुको उजुरी लिन आनाकानी गरिएको छ ।

यसअघि जसपाका नेताहरुसँग डा. यादव प्रहरी परिसर टेकु पुगेका थिए । तर, त्यहाँ प्रहरीले उजुरी लिन मानेको थिएन । प्रहरीले उनीहरुलाई महोत्तरीमा नै गएर उजुरी दिन भनेको थियो । 

आज सरकारी वकिलको कार्यालयमा यादवसँगै जसपाका नेताहरु राजेन्द्र महतो, राजेन्द्र श्रेष्ठ पनि छन् ।

बस्नेत, श्रेष्ठ र खनालले तत्कालीन समाजवादी पार्टीका सांसद डा। यादवलाई १० वैशाखमा महोत्तरीबाट काठमाडौं ल्याएका थिए ।

यादवले आफूलाई जबर्जस्ती काठमाडौं ल्याएको भन्दै अपहरणको मुद्धामा अनुसन्धान गर्न जाहेरी दिन लागेका हुन् ।