काठमाडौं– पार्टीबाट राजीनामा लागि चर्को दबाब आउन थालेपछि प्रधानमन्त्री केपी शर्मा ओलीले संसदीय दलमा बहुमत पुर्‍याउन विशेष कसरत गर्न थालेका छन् । उनले आफ्नो पक्षमा यसअघि भएका सांसदहरुलाई मात्र होइन, पूर्वमाओवादी सांसदहरुसँग पनि भेटघाट बढाउन थालेका छन् ।

यही क्रमको सिलसिलास्वरुप नेपाल कम्युनिस्ट पार्टी (नेकपा)का अध्यक्ष ओलीले आफूनिकट सांसदहरुलाई आज १० बजे विशेष बैठकका लागि बालुवाटारमा बोलाएका छन् ।

उनले मंगलबार दिनभर पनि बालुवाटारमा आफूनिकट सांसदहरुसँग कुराकानी गरेका थिए । उनीहरुलाई भावुक सन्देश दिँदै अहिले देश र पार्टीका लागि सहयोग गर्न अनुरोध गरेको छलफलमा सहभागी एक सांसदले फरकधारलाई बताएका छन् । 

मंगलबार बालुवाटार बैठकमा सहभागी भएका पूर्वएमालेका सांसदहरुले पनि ओलीलाई साथ दिने आश्वासन दिँदै आफ्नो मागमा अडिग रहन अनुरोध गरेका छन् । 

जस्तोसुकै परिस्थितिको पनि सामाना गर्न निर्देशन दिएका ओलीलाई बालुवाटारमा सांसदहरुले पनि उनी गलत नभएको ढाडस दिएका थिए ।

अर्कोतिर, प्रधानमन्त्री ओलीले आफू र आफ्ना दूतहरुमार्फत् पूर्वमाओवादी र माधव नेपाल समूहका सांसदहरुलाई पनि भेटघाट गर्न सुरु गरेका छन् । 

संसदमा नेकपाका एक सय ७४ सांसद छन् । यीमध्ये ओलीले आफूसँग ७८ सांसद भएको विश्वास लिएका छन् । अब बहुमतका लागि आवश्यक १० सांसद पनि आफूले सहजै पाउने ओली र उनको पक्षको विश्वास छ । संसदमा पूर्वमाओवादी समूहका ५३ मध्ये केही सांसद आफ्नो पक्षमा आउनेमा ओली समूह ढुक्क छ । त्यसैले पनि प्रधानमन्त्री ओली ‘जुनसुकै’ कदम चाल्न अग्रसर हुन थालेका छन् । 

झन्, पूर्वमाओवादी समूहका गृहमन्त्री रामबहादुर थापा बादल र उद्योगमन्त्री लेखराज भट्टले ओलीलाई समर्थन गर्ने संकेत दिएपछि ओली समूहलाई यसमा आफूहरु सहज रुपमा अगाडि बढ्न सक्नेमा विश्वस्त छन् । 

अर्कोतिर पार्टीका अर्का अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल आफूहरुसँग पहिले नै ९६ जनाभन्दा बढी सांसद भएकाले ओलीविरुद्ध अविश्वासको प्रस्ताव लैजाँदासमेत आफूहरुको जित हुनेमा विश्वस्त छन् । 

आज साँझ बस्ने भनिएको सचिवालय बैठकपछि नेकपामा अब के हुन्छ भन्नेमा प्रष्ट तस्वीर आउने देखिएको छ ।