काठमाडौं– अमेरिकाको प्रख्यात गायन रियालिटी सो अमेरिकन आइडलमा नेपालका युवा दिवेश पोखरेलले टप १० मा स्थान बनाएका छन् । उनले पछिल्लोपटक जोन डेनभरको चर्चित गीत ‘कन्ट्री रोड’ गाउँदै टप १०मा स्थान सुरक्षित गरेका हुन् ।

अमेरिकन आइडलमा आफूलाई ‘अर्थर गन’ नामले चिनाएका दिवेशलाई टप ५ को दाबेदारका रुपमा हेरिएको छ । अडिसन राउन्डदेखि नै अब्बल प्रस्तुति दिँदै आएका दिवेशको गायनको सबैले तारिफ गरेका छन् । 

दिवेशले आफ्ना समर्थकहरुलाई धन्यवाद दिँदै संसारभरबाट आफूलाई ठूलो माया र हौसला प्राप्त भइरहेको उल्लेख गरेका छन् । उनले भनेका छन्, ‘मेरो आवाज तपाईंसम्म पुर्‍याउन पाउँदा आफूलाई भाग्यमानी सम्झेको छु । मलाई भोट दिनुहुने सबैप्रति आभारी छु ।’

दिवेश प्लस टु उत्तीर्ण गरेर सन् २०१४ मा उच्च शिक्षा अध्ययनका सिलसिलामा अमेरिका गएका थिए ।