सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल प्रचण्डले अब लिपुलेकको विषयमा भारतसँग मात्र नभएर चीनसँग पनि वार्ता गर्नु पर्ने बताएका छन् । उनले लिपुलेकको सीमा विवाद नेपाल र भारतसँग मात्र नजोडिएर चीनसँग पनि जोडिने भएकाले चीनसँग पनि वार्ता गर्नु पर्ने बताएका हुन् ।
प्रतिनिधिसभाको राज्य व्यवस्था तथा सुशासन समितिको बैठकमा उनले नेपाल र भारतबीच लिम्पियधुराको विषयमा छलफल गरेर मात्र नहुने बताएका हुन् । पछिल्लो समय भारतले लिपुलेकमा नेपाली भूमि प्रयोग गर्दै मानसरोवर जाने बाटो खोलेपछि यसमा चीन पनि संलग्न भएको प्रचण्डले निष्कर्ष निकालेका हुन् ।
‘लिपुलेक प्रकरण पछि अब यो त्रिदेशीय विषय बनेको छ, अब दुई देशले मात्र हल गरेर पनि हुँदैन, अप्ठ्यारो छ,’ प्रचण्डले भने, ‘यो विषयमा चीन पनि संलग्न भएको छ, भारत र चीनबीच सम्झौता भएको छ । अब यो विषयमा चीनसँग पनि वार्ता गर्नुपर्छ ।’
भारत र चीनबीच यो लिपुलेक हुँदै मानसरोवर बाटो लैजाने सम्झौता २०७२ सालमा भएको थियो ।
यही आधारमा प्रचण्डले चीनसँग पनि वार्ता हुनु पर्ने विषय उठाएका छन् । तर, यो विषय अहिले अन्तर्राष्ट्रिय अदालतमा लैजान चाहिँ नहुने प्रचण्डको भनाइ छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।