नेपालमा कोरोनाभाइरस संक्रमितको संख्या सोमबार ह्वात्तै बढ्यो । सोमबार मात्र २४ जनामा कोरोनाभाइरस संक्रमण देखिएपछि नेपालमा कोरोनाभाइरस संक्रमितको संख्या बढेर १ सय ३४ पुगेको हो ।
सोमबार कपिलवस्तुमा मात्र १७ जना कोरोनाभाइरसका नयाँ संक्रमित भेटिएका हुन् । उनीहरु यशोधरा गाउँपालिका र बुद्धभूमि नगरपालिकाका बासिन्दा हुन् ।
त्यस्तै, सोमबार नै रुपन्देहीमा थप ६ जनामा कोरोनाभाइरस संक्रमण देखिएको थियो ।
यसअघि एकै दिन नेपालगन्जमा पनि ११ जनामा कोरोनाभाइरस संक्रमण देखिएको थियो । उता, उदयपुरको भुल्केमा पनि एकै दिन १७ जनालाई कोरोनाभाइरस देखियो ।
फाट्टफुट्ट एक जनामा मात्र पनि नयाँ ठाउँहरुमा कोरोनाभाइरस संक्रमित भेटिएका छन् । जस्तो कि सोमबार सप्तरीमा एक युवामा कोरोनाभाइरस संक्रमण देखियो ।
तर, एकै पटक धेरैमा देखिँदा होस् या फाट्टफुट्ट एक जनामा कोरोनाभाइरस देखिँदा किन नहोेस्, पछिल्ला दिन अधिकांश कोरोनाभाइरस संक्रमित भारतबाट लुकिछिपी नेपाल प्रवेश गरेको पाइएको छ ।
नेपालमा पहिलो चार कोरोनाभाइरस संक्रमित चाहिँ युरोप र साउदी अरबबाट आएका व्यक्तिमा देखिएको थियो । जनवरीमा नै पहिलो पटक कोरोनाभाइरस संक्रमित भेटिएका व्यक्ति चाहिँ चीनबाट आएका थिए । त्यसपछि मैतीदेवीकी १९ वर्षीया युवती फ्रान्सबाट नेपाल आएकी थिइन् जसमा कोरोनाभाइरस संक्रमण देखिएको थियो ।
सरकारले त्यसपछि अन्तर्राष्ट्रिय उडानहरुमा प्रतिबन्ध लगायो । सरकारले उडानहरुमा प्रतिबन्ध लगाएसँगै अन्य देशबाट आउने नेपालीहरु छैनन् । तर, भारतसँगको सीमा खुला हुँदा भारतका विभिन्न ठाउँबाट लुकिछिपी नेपाल प्रवेश गर्नेहरु अझै पनि रोकिएका छैनन् । र, उनीहरुमा कोरोनाभाइरस संक्रमण पनि देखिएको छ ।
पछिल्ला केही दिन यता भारतमा लकडाउन खुकुलो भएको छ । योसँगै सीमामा सयौँ नेपालीहरु आएका छन् । उनीहरु सीमामा अलपत्र परेका छन् । नेपाल सरकारले चाहिँ यसरी सीमामा आइपुगेकाहरुलाई तत्काल नेपाल ल्याउने कुनै योजना बनाएको छैन ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।