भारतमा कोरोनाभाइरस नियन्त्रणका लागि लगाइएको लकडाउन पछि बलिउड अभिनेता सोनु सुद लकडाउनका कारण फँसेका मजदूरलाई घर पुर्याउन मात्र तल्लिन छैनन्, खान नपाएकाहरुलाई खाने कुराको प्रबन्ध पनि मिलाइरहेका छन् ।

उनले गरेको यो कामको तारिफ पनि निकैले गरेका छन् । त्यसैले हुनुपर्छ, भारतमा ट्विटरमा सोनुसुद ट्याग ट्विटरमा सबैभन्दा माथि आएको छ । र, उनलाई मानिसहरु सबैले लकडाउनका हिरो भन्न थालेका छन् ।

समाचार एजेन्सी पिटिआइलाई केही दिनअघि दिएको एक अन्तर्वार्तामा उनले भनेका थिए कि उनी जुनसुकै हालतमा पनि मजदूरलाई सहयोग गर्नेछन् । उनले मजदूरको दुःख आफूले देख्न नसकेको पनि बताएका थिए । 

त्यही भएर हुनुपर्छ, अब ट्विटरमा उनको निकै प्रशंसा मात्र गरिएको छैन, उनको खोजी पनि बढ्न थालेको छ ।

उत्तर प्रदेश सरकारसँग अनुमति लिएर सोनुले यो काम सुरु गरेका थिए । उनले मजदूरहरुका लागि बसको व्यवस्था मात्र गरेनन्, उनले यसको संकल्प पनि लिए । 

४६ वर्षका सोनुले उत्तर प्रदेश, बिहार, झारखण्ड, कर्नाटकलगायतका राज्यमा मजदूरहरुलाई जान सहयोग पनि गरे । 

यतिमात्र होइन, उनले चिकित्सकहरुका लागि १५ सयभन्दा धेरै पिपिई पनि दान गरेका छन् । उनले मुम्बईको आफ्नो होटलमा चिकित्सकहरुलाई राखेका छन् । 

त्यसैले हुनुपर्छ, फिल्महरूमा खलनायकको भूमिका निर्वाह गर्ने सोनुलाई असल जीवनमा मानिसहरुले भनिरहेका छन्– मजदूरका भगवान, जीवनका खास हिरो । 

यतिमात्र होइन, कतिले त उनलाई अबका महाराष्ट्रका मुख्यमन्त्री समेत बनाउनु पर्ने माग राखेका छन् ।