कोरोना भाइरसका कारण वैदेशिक रोजगारीका क्रममा अहिलेसम्म १० जना नेपाली श्रमिकले ज्यान गुमाएका छन् ।

वैदेशिक रोजगार बोर्डका अनुसार वैदेशिक रोजगारीका सिलसिलामा विभिन्न देशमा गएकामध्ये १० जनाको कोभिड १९ बाट सङ्क्रमित भएर मृत्यु भएको हो । नेपाल सरकारले लकडाउन सुरु गरेदेखि विदेशमा मृत्यु भएका २०७ जना श्रमिकमध्ये १० जनाको कोरोना भाइरसका कारण मृत्यु भएको जनाएको हो ।

बोर्डका कार्यकारी निर्देशक राजनप्रसाद श्रेष्ठले नेपालमा लकडाउन सुरु भएदेखि अहिलेसम्म वैदेशिक रोजगारीमा रहेका १० जनाको कोभिड १९ कारण ज्यान गएको आधिकारिक जानकारी आएको बताएका छन् । जसमा संयुक्त अरब इमिरेट्स (यूएई)मा पाँच जना, साउदी अरेबियामा तीन जना, कतार र टर्कीमा एक/एक जना छन् ।

श्रेष्ठले कोभिड १९ कारण ज्यान गुमाएका सबैको परिवारसँग सहमति लिएर सम्बन्धित देशमा शवको अन्त्येष्टि गरिएको जानकारी पनि दिएका छन् ।