काठमाडौं– गत जेठ १९ गते संसदमा बोल्दै सांसद गंगा चौधरीले संसदमा ‘भारतीय चेलीको दादागिरी चलेको’ भनेर दिएको अभिव्यक्तिमाथि सांसद सरिता गिरीले आपत्ति जनाएकी छिन् । शुक्रबारको प्रतिनिधिसभा बैठकमा बोलदै उनले चौधरीको उक्त अभिव्यक्ति संसदको रेकर्डबाट समेत हटाउन आग्रह गरेकी छिन् ।

चौधरीको अभिव्यक्तिलाई ‘हेट स्पिच’को संज्ञा दिँदै गिरीले आफ्नो पदको मर्यादा नभएको भए चौधरीविरुद्ध भौतिक आक्रमणमा उत्रिने बताइन् ।

कानुनी कारबाहीका लागि सो ‘हेट स्पिच’ पर्याप्त रहेको उल्लेख गर्दै भनिन्, ‘म सरकार र गृह मन्त्रालयको ध्यानाकर्षण गराउँछु कि यो रेकर्डलाई लिएर कानुनी प्रक्रिया अघि बढाइयोस् । पूरै सार्वभौम संसदमाथि आक्रमण भएको छ । त्यसकारण यो हेट स्पिचलाई संसदको रेकर्डबाट हटाउनुहोस् ।’