कोरोनाभाइरस रोकथाम तथा नियन्त्रणका लागि ११ चैतबाट लगाइएको लकडाउन आजबाट खुकुलो हुँदैछ । सरकारले कोभिड १९ रोकथाम तथा नियन्त्रणका लागि लगाएको लकडाउनलाई तीन चरणमा खोल्ने निर्णय गरेको छ । बुधबारको मन्त्रिपरिषद् बैठकले यस्तो निर्णय गरेको हो ।
उच्चस्तरीय समन्वय समितिको प्रस्तावअनुसार यो खाका तयार गरिएको हो ।
सरकारले लिएको निर्णयअनुसार अब तीन चरणमा पहिलो चरण २१ दिनको हुनेछ । त्यसपछिका दुई चरण १५–१५ दिनका हुनेछन् ।
यी तीन चरण पूरा भएपछि सरकारले कोरोनाभाइरस संक्रमणको स्थितिलाई विश्लेषण गर्ने र पुरानै अवस्थामा विभिन्न सेवा तथा व्यवसायको सुचारु गर्ने बताइएको छ ।
सरकारले तयार पारेको खाकाअनुसार पहिलो चरणमा बिहीबारबाट अत्यावश्यक सेवाहरु सुरु हुने भएका छन् ।
सरकारका अनुसार निम्न सेवाहरु बिहीबारबाट सुरु हुनेछन्ः
स्वास्थ्य सेवासँग सम्बन्धित सबै सेवा, निजी क्लिनिकसमेत
औषधि, खाद्य तथा पेयपदार्थ, तरकारी, फलफूल, दुग्धपदार्थ, अन्डा, माछा, मासु, खानेपानी उत्पादन, बिक्रीवितरण तथा ढुवानी
पेट्रोलियम पदार्थको ढुवानी र बिक्रीवितरण
फोहोरमैला व्यवस्थापन
विद्युत, दमकल, एम्बुलेन्स, सञ्चार तथा प्रसारण, हुलाक सेवा
बैंक तथा वित्तीय संस्था, सहकारी र बिमा सेवा
सबै प्रकारका कृषि तथा पशुपन्छी पालनसम्बन्धी कार्य
कृषि बीउ बिजन, रासायनिक मल, कृषि औजार र शीतभण्डारसम्बन्धी सेवा तथा कार्य
उत्पादनशील उद्योग
निर्माण सामग्रीसम्बन्धी उद्योग व्यवसाय
विकास आयोजना (निजी क्षेत्रबाट प्रवर्द्धितसमेत)
निर्माण कार्य (निजीसमेत)
नदी तथा खानीजन्य पदार्थ उत्खनन्, संकलन, ढुवानी र बिक्रीवितरण
रेस्टुरेन्टबाट हुने प्याकिङ तथा टेकअवे सेवा
क्वारेन्टिनका लागि तोकिएका होटल
बिजुलीका सामान बिक्री र मर्मत
विद्युतीय उपकरण, मेसिनरी र सवारी साधन मर्मत गर्ने वर्कसप
पुस्तक पसल तथा स्टेसनरी
सबै प्रकारका ढुवानी सेवा
अत्यावश्यक सेवाका कार्यालय
अन्य सरकारी कार्यालय, गैरसरकारी तथा निजी क्षेत्रका कार्यालय र बैंक तथा वित्तीय संस्थाहरू (सामान्यतया ५० प्रतिशत कर्मचारी रहने गरी)
तर, यो पहिलो चरणमा पनि सरकारले धेरै भीडभाड हुने ठाउँहरुमा चाहिँ लकडाउन जारी राख्ने योजना बनाएको छ । यसमा सबै शैक्षिक संस्थासहित सपिङ मल, सिनेमा हल, पार्टी प्यालेस, जात्रा, मेला, सभा, सम्मेलन, धार्मिक स्थल, जिम, खेलकुदप्रतियोगिताहरुमा लकडाउन जारी रहने बताएको छ ।
सरकारले २१ दिनसम्म यो पहिलो चरणलाई अगाडि बढाएको हो । त्यसपछि बल्ल दोस्रो चरण सुरु हुने भनिएको छ । दोस्रो चरणमा सरकारी कार्यालय, निजी कार्यालयहरु ७५ प्रतिशत कर्मचारी रहने गरि खुलाउने भनिएको छ ।
दोस्रो चरणमा रेष्टुरेन्ट तथा खाजा घरहरु पनि खुल्नेछन् । तर, उनीहरुले एउटा टेबलमा २ मिटरको दूरी कायम गर्नु पर्ने हुन्छ ।
दोस्रो चरण १५ दिनसम्म लागु गरेपछि सरकारले अन्य सेवाहरु पनि खुल्ने भएको छ । तेस्रो चरणमा मात्र एकबाट अर्को जिल्लामा जान पाइने खाका तयार भएको छ ।
यो चरण पनि १५ दिन लागु गर्ने सरकारको तयारी छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।