चीनमा सोमबार अधिकारीहरुले पछिल्लो २४ घन्टामा कोरोना संक्रमण भएका ४९ जना भेटिएको बताएका छन् । यीमध्ये कम्तिमा पनि ३६ जना चीनको राजधानी बेइजिङका हुन् । 

बेइजिङमा लगातार दोस्रो दिन रेकर्ड संख्यामा संक्रमित भेटिएका हुन् । आइतबार पनि बेइजिङमा ३६ जना नै कोरोना संक्रमित भेटिएका थिए ।

समाचार एजेन्सी एएफपीका अनुसार बेइजिङको हेडियान क्षेत्रमा एक थोक मन्डीमा कोरोना संक्रमित भेटिन थालेपछि त्यहाँ वरपरका १० विभिन्न क्षेत्रमा लकडाउन लगाइएको छ ।

कोरोनाभाइरसको सुरुवात गत वर्ष पहिलो पटक चीनमा नै भएको थियो । तर, निकै छोटो समयमा चीनले कोरोनामाथि नियन्त्रण पाएको थियो । तर, फेरि पछिल्ला केही दिन यता बेइजिङमा कोरोनाभाइरस संक्रमित भेटिन थालेका छन् ।