स्पेनिस क्लब बार्सिलोनाले बन्द रंगशालामा भएको खेलमासमेत सुरक्षा घेरा तोडेर आफ्ना कप्तान लियोनल मेसीसँग सेल्फी लिन खोज्नेविरुद्ध कानूनी कारवाहीका लागि प्रक्रिया थाल्ने जनाएको छ ।

ला लिगा फुटबलअन्तर्गत शनिबार राति भएको मालोर्कासँगको खेलको क्रममा एक व्यक्ति सुरक्षा घेरा तोडेर मैदानमा छिरेका थिए ।

कोरोनाभाइरसको संक्रमण फैलिन नदिनका लागि सावधानी अपनाएर बन्द रंगशालामा भएको खेलमा भएको यस्तो गतिविधि कुनै पनि हिसाबले स्वीकार्य नहुने बार्सिलोनाले उल्लेख गरेको छ । ला लिगाले यसलाई आपराधिक गतिविधिका रुपमा लिने जनाएको छ ।

बार्सिलोना ४–० ले विजयी भएको खेलमा मेसीको नाम लेखेको अर्जेन्टिनाको जर्सी लगाएका एक फ्यान दोस्रो हाफको सुरुमा मैदानमा पसेका हुन् ।
यद्यपि, उनी मेसीभन्दा केही मिटर पर रहेर तस्बिर लिन सफल भने भए ।