स्पेनिस ला लिगा फुटबलमा सेभिया लेभान्टेसँग १–१ गाृलको बराबरीमा रोकिएको छ । भ्यालेन्सियामा सोमबार राति भएको खेलमा आफ्नै गल्तीका कारण सेभिया बराबरीमा रोकिन बाध्य बनेको हो ।

पहिलो हाफमा गोलरहित बराबरीमा टुंगिएको थियो । निकै प्रतिस्पर्धात्मक बनेको खेलका दोस्रो हाफको शुरुमै लुक डि जोङले गोल गर्दै सेभियालाई अग्रता दिलाएका थिए ।

निर्धारित समयको खेल सकिन तीन मिनेट बाँकी रहँदा अर्थात् ८७ औं मिनेटमा डिएगो कार्लाेसले आत्मघाती गोल गरेपछि सेभिया जितबाट वञ्चित बन्न पुग्यो । त्यसपछि दुवैतर्फबाट केही राम्रा प्रयास भए पनि थप गोल हुन नसक्दा सेभियाले ३ अंक गुमाउन बाध्य बन्यो ।

 
बराबरीसँगै तेस्रो स्थानमा रहेको सेभियाको ५१ अंक पुगेको छ भने लेभान्टे ३५ अंकसहित एक स्थान माथि अर्थात् १२औं स्थानमा रहेको छ ।

गएराति नै भएको अर्काे खेलमा रियल बेटिस र ग्रानाडाले २–२ गोलको बराबरी खेल्दै अंक बाँडे ।

बराबरीसँगै ग्रानाडाले भिल्लारियललाई एक अंकले पछि पार्दै आठौं स्थानमा उक्लिएको छ । रियल बेटिस भने १३औं स्थानमा यथावत छ ।