बझाङको छबिस पाथीभेरा गाउँपालिकामा क्वारन्टिनमा बसेका एक युवाले आइतबार राति आत्महत्या गरेका छन् ।​

छबिस पाथीभेरा गाउँपालिका –७ स्थित मजखोरी माविको क्वारेन्टिनमा बसेका ३२ वर्षीय रमेश धामीले आत्महत्या गरेको वडा नम्बर ७ का वडाध्यक्षा पदमबहादुर मण्डेलले बताए ।

क्वारेन्टिनमा आवतजावत कोही कसैले पनि नगरुन् भन्ने उद्देश्यले डोरीको बार हालिएको थियो । सोही डोरीलाई नै लिएर धामीले क्वारेन्टाइनभित्रै झुण्डी आत्महत्या गरेका बुझिएको वडा अध्यक्ष मण्डेलको भनाइ छ ।

धामी असार ६ गते मात्रै भारतको ब्यालोरबाट घर पुगेका थिए । भारतबाट आएका धामीका श्रीमती र कान्छा छोरा भारतमा नै रहेका र उनका एक छोरा एक छोरी भने गाँउमा रहेको उनको भनाइ छ ।

के कति कारणले आत्महत्या गरे भन्ने कुरा नबुझिएको जिल्ला प्रहरी कार्यालय, बझाङका डिएसपी गणेश बमले बताए । अहिले सदरमुकाम चैनपुरबाट प्रमख जिल्ला अधिकारी कमलराज भण्डारीसहित डीएसपी गणेश बम र जिल्ला अस्पतालबाट डाक्टरसहितको टोली घटनास्थलतर्फ जाने तयारी भइरहेको डीएसपी बमले बताए । अहिले उक्त क्वारेन्टिनमा तीन जना छन् ।