नयाँ दिल्ली भारतमा कोरोना एकदिनमा अहिलेसम्मकै बढी झन्डै १६ हजार जनामा संक्रमण पुष्टि भएको छ। भारतको केन्द्रीय स्वास्थ्य तथा परिवार कल्याण मन्त्रालयले बुधबार दिएको जानकारीअनुसार देशमा एकैदिन १५ हजार ९ सय ६८ जनाका संक्रमण पुष्टि भएको हो। यो पछिल्लो २४ घण्टामा भेटिएका संक्रमित हुन्।  

सोही अवधिमा भारतमा कोरोनाका कारण ४ सय ५६ जनाको मृत्यु भएको छ। योसँगै भारतमा मृतकको कूल संख्या १४ हजार ४ सय ७६ पुगेको छ भने संक्रमितको संख्या ४ लाख ५६ हजार १ सय ८३ पुगेको मन्त्रालयले जनाएको छ।  

तीमध्ये अहिलेसम्म २ लाख ५८ हजार ६ सय ८५ जना निको भएका छन्।  प्रदेशअनुसार सबैभन्दा धेरै महाराष्ट्रमा संक्रमित छन्। महाराष्ट्रमा अहिलेसम्म १ लाख ३९ हजार १० संक्रमित छन्। त्यसैगरी यहाँ अहिलेसम्म ६ हजार ५ सय ३१ जनाको मृत्यु भएको छ।

अधिकारीका अनुसार केन्द्रीय राजधानीसमेत रहेको दिल्लीमा संक्रमितको संख्या ६६ हजार ६०२ पुगेको छ। तीमध्ये २ हजार ३०१ जनाको मृत्यु भएको छ। त्यसैगरी कोरोनाबाट बढी तेस्रो प्रभावित तमिलनाडु राज्यमा ६४ हजार ६०३ जना संक्रमित भएका छन्। तीमध्ये ८ सय ३३ जनाको मृत्यु भएको छ।