बेलायतमा कोरोनाभाइरसविरुद्ध बनेको भ्याक्सिन अब आम मानिसमा पनि परीक्षण गर्ने तयारी सुरु भएको छ । लन्डनको इम्पेरियल कलेजमा ३ सय मानिसमा यो ट्रायल गरिने बताइएको छ । 

इमपेरियल कलेज लन्डनमा हुने यो परीक्षणको नेतृत्व प्रोफेसर रोबिन शटोकले गर्ने भएका हुन् । 

यो भ्याक्सिनले यसअघि जनावरमा गरेको परीक्षणमा राम्रो नतिजा दिएको र अब मानिसमा पनि यसले इम्युनिटी पावर बढाउन सहयोग गर्ने भनिएको छ ।

अहिले विश्वका १ सय २० ठाउँमा कोरोनाभाइरस भ्याक्सिनको परीक्षण गर्ने तयारी भएको छ । यीमध्ये १३ ठाउँमा त कोरोनाको भ्याक्सिन क्लिनिकल ट्रायलमा पुगिसकेको छ । यीमध्ये पाँच चीन, तीन अमेरिका र दुई बेलायत, अष्ट्रेलिया, जर्मनी र रुसमा पनि कोरोना भ्याक्सिन परीक्षणको तयारी भएको छ ।