सत्तारुढ नेपाल कम्युनिस्ट पार्टी (नेकपा)को स्थायी कमिटीको बैठक आज पनि बस्दैछ ।
प्रधानमन्त्री निवास बालुवाटारमा बिहान ११ बजेका लागि बैठक बोलाइएको छ ।
बैठक बुधबार सुरु भएको हो । यद्यपि, दोस्रो दिनको बैठक शुक्रबार बसेको थियो ।
प्रधानमन्त्री केपी शर्मा ओली बैठकमा उपस्थित नभएपछि त्यसको विरोध भएको थियो ।
विरोधको अग्र मोर्चामा भीम रावल थिए । त्यसपछि प्रधानमन्त्रीको अनुपस्थितमा बैठकमा सीमा समस्यामा छलफल भएको थियो ।
शुक्रबारको बैठकमा १८ जना सदस्यहरुले आफ्नो धारणा राखेका थिए ।
बैठकको सुरुमा परराष्ट्रमन्त्री समेत रहेका प्रदीप ज्ञवालीले बोलेका थिए । भारतसँग तीन पटकसम्म वार्ताको प्रयास गरेको तर उसले बेवास्ता गरेको उनले बताएका थिए ।
बैठकमा ज्ञवालीले चीनद्वारा नेपाली भूमि अतिक्रमण भएको भन्ने प्रचारमा सत्यता नभएको स्पस्ट पारे । उनको यो संकेत भारतीय मिडियाहरुप्रति थियो ।
बुधबारको बैठकमा भने अध्यक्षद्वय ओली र पुष्पकमल दाहाल प्रचण्डले एक अर्काप्रति तितो पोखेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।