झापाको मेचीनगरमा आइतबारबाट कोरोनाभाइरसको मास टेस्टिङ सुरु भएको छ । पछिल्लो समय संक्रमित थपिँदै जाँदा समुदायमा कोरोनाभाइरस फैलिएको हुनसक्ने भन्दै मेचीनगरमा मास टेस्टिङ सुरु भएको हो ।

मेचीनगर नगरपालिका र स्वास्थ्य कार्यालय झापाले पूर्वीनाका काँकडभिट्टाबाट मास टेस्टिङ सुरु गरेका हुन् ।

नगरपालिकाका सामाजिक विकास समितिका संयोजक नवीन बरालले दिएको जानकारीअनुसार आइतबार त्यहाँ १ सय १७ जनाको स्वाब संकलन गरिएको छ । यसको परीक्षणका लागि प्रयोगशाला पठाइएको छ । 

शुक्रबार मात्र काँकडभिट्टामा २० जना सशस्त्र प्रहरीमा कोभिड १९ संक्रमण देखिएको थियो । त्यसपछि त्यहाँ कोरोनाभाइरस समुदायमा फैलिएको हुनसक्ने आशंका गरिएको छ ।

मेचीनगरमा अहिलेसम्म ७० जनामा कोरोनाभाइरस संक्रमण पुष्टि भइसकेको छ । यीमध्ये ४६ जनाले कोरोनालाई जितिसकेका छन् । २४ जना अहिले पनि उपचाररत रहेकाे राससमा प्रकाशित समाचारमा उल्लेख छ ।