काठमाडौं– नेपाली कांग्रेसका वरिष्ठ नेता रामचन्द्र पौडेलसहित केही कांग्रेस नेताले सत्याग्रहमा रहेका ‘इनफ इज इनफ’ अभियानका अभियन्ताहरुलाई वसन्तपुर पुगेर भेटेका छन् ।
भेटपछि पौडेलले अनशनरत युवाका मागप्रति सरकारले बेवास्ता गर्नु सरकारको चरम लापरबाही भएको बताए । सामान्य तर नागरिकका अति आवश्यक मागहरु राखेर अनसनमा बसेका युवाहरुको कुरा नसुन्नु सरकारको अटेरीपन भएको पौडेलको भनाइ थियो ।
इनफ इज इनफमा आबद्ध केही युवा क्वारेण्टीन व्यवस्थापन गर्नुपर्ने, पिसिआर परीक्षणको दायरा बढाउनुपर्नेलगायत माग राखेर १६ दिनदेखि अनशनमा छन् । कांग्रेस नेताहरुले अभियन्ताहरुलाई भेटेर उनीहरुको स्वास्थ्य लाभको कामना गरे ।
यसअघि कांग्रेसका सभापति शेरबहादुर देउवालगायतका नेताहरुले पनि सत्याग्रहीहरुलाई भेटेका थिए । भेटमा उनले सत्याग्रह छाडेर आन्दोलनमा आउन आग्रह गर्दै आफूले पनि आन्दोलनलाई साथ दिने आश्वासन दिएका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।