लेबनानको राजधानी बेरूतमा गत मङ्गलबार भएको विस्फोटबाट करिब ८० हजार बालबालिका विस्थापित भएको संयुक्त राष्ट्रसंघीय बालकोष (युनिसेफ) ले शुक्रबार जनाएको छ ।
विस्फोटका कारण धेरै बालबालिकामा मनोवैज्ञानिक प्रभाव परेकोप्रति चिन्ता व्यक्त गर्दै पीडित बालबालिका तथा उनीहरूको परिवारलाई सहयोग पुर्‍याउने प्रयास भइरहेको युनिसेफले एक विज्ञप्तिमार्फत जानकारी गराएको छ ।

“विगत ४८ घण्टादेखि युनिसेफले लेबनानी अधिकारी तथा उद्धारमा खटिएका सहयोगी संस्थाहरूसँग सहकार्य गरी प्रभावित परिवारको आवश्यकता अनुसार सहयोग गरिरहेको छ,” विज्ञप्तिमा भनिएको छ ।   

युनिसेफले पीडित बालबालिका तथा उनीहरूका परिवारको स्वास्थ्य, खानेपानी तथा अन्य तत्काल आवश्यकताका विषयमा नजिक रहेर काम गरिरहेको युनिसेफका लेवनानस्थित प्रतिनिधि भाएलेट स्पिक वार्नीले बताए ।
  
लेवनान विस्फोटमा परी मृत्यु हुनेको सङ्ख्या शुक्रबार साँझसम्म १ सय ५४ पुगेको लेवनानी स्वास्थ्य मन्त्री हमद हसनले बताए ।