पछिल्लो केही समय यता नेपाल कम्युनिस्ट पार्टी (नेकपा)मा देखिएको विवादका कारण १० असारबाट सुरु भएको स्थायी कमिटी बैठक अहिले अनिश्चितकालका लागि स्थगित भएको छ ।
नेकपामा दुई अध्यक्ष प्रधानमन्त्री केपी शर्मा ओली र पुष्पकमल दाहाल प्रचण्ड दुई खेमामा बाँडिएपछि यो विवादको अन्त्य तत्काल हुने देखिँदैन । दुवै अध्यक्ष आआफ्ना अडानमा अहिले पनि अडिग छन् । केही दिन यता त यी दुईबीच वार्ता पनि हुन सकेको छैन ।
पछिल्लो समय यी दुईबीच अहिलेको विवाद स्थायी कमिटीमा वा सचिवालयमा लगेर छलफल गर्ने भन्ने विषयमा पनि कुरा मिलेको छैन । यहीबीच नेकपा प्रवक्ता नारायणकाजी श्रेष्ठले अहिलेको विवाद अन्त्य गर्न तत्काल स्थायी कमिटी बैठकको सुचारु गर्नु पर्ने माग गरेका छन् ।
‘आजको संकटको निकासको निम्ति जारी स्थायी कमिटी बैठक तुरुन्त सुचारु गरौँ,’ श्रेष्ठले सामाजिक सन्जाल फेसबुकमा एक स्टाटस लेखेका छन्, ‘छलफल गरौँ । आवश्यकताअनुसार शीर्षस्थ नेताहरुबीच र सचिवालयमा गृहकार्य गरौँ ।’
उनले केन्द्रीय कमिटीको निर्णयअनुसार महाधिवेशनको तयारी गर्ने गरि निकास निकाल्नु पर्नेमा जोड दिएका छन् ।
उनले थपेका छन्, ‘पार्टी, कम्युनिस्ट आन्दोलन, देश र जनतालाई विजयी बनाऔँ, व्यक्तिगत आरोप, प्रत्यारोप वा गालीगलौजका रुपमा होइन, वैचारिक सैद्धान्तिक, राजनीतिक र प्रवृत्तिगत विषयमा छलफल गरौँ ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
