पछिल्लो २४ घण्टामा काठमाडौं उपत्यकामा थप ९२ जना नयाँ कोरोना संक्रमित थपिएका छन् ।

विभिन्न प्रयोगशालामा गरिएको पिसिआर परीक्षणमा काठमाडौंका ९० र ललितपुरमा २ जना संक्रमित भेटिएको स्वास्थ्य तथा जनसंख्या मन्त्रालयको नियमित पत्रकार सम्मेलनमा प्रवक्ता डा. जागेश्वर गौतमले जानकारी दिए ।

बन्दाबन्दी खुकुलो भएसँगै काठमाडौं उपत्यकामा कोरोना संक्रमितको संख्या दिनहुँ ठूलो संख्यामा बढिरहेको छ ।

योसँगै काठमाडौंमा मात्रै कोरोना संक्रमितको संख्या ९१० जना पुगेको छ भने ललितपुरमा १३९ जना पुगेको छ । भक्तपुरमा हालसम्म ८५ जनामा कोरोना संक्रमित रहेको उनले जानकारी दिए ।

भेटिएका संक्रमितहरू राष्ट्रिय प्रयोगशाला टेकु, शुक्रराज ट्रपिकल टेकु, नेपाल प्रहरी अस्पताल महाराजगञ्ज, स्टार अस्पताल ललितपुर, शिक्षण अस्ताल महाराजगञ्ज, पाटन अस्पताल र कोरिया नेपाल मैत्री अस्पताल भक्तपुरमा भेटिएका हुन् ।