दक्षिण कोरियाका अधिकारीहरुले कोरोनाभाइरस अहिले पूरै देशमा फैलिन सक्ने चिन्ता व्यक्त गर्न थालेका छन् । सबैभन्दा आश्चर्य त के भने कुनै समय दक्षिण कोरिया कोरोनाभाइरससँग लड्नका लागि सबैभन्दा काबिल देशका रुपमा चिनिएको थियो ।

सिओलमा रहेका बिबिसी संवाददाता लारा बिकरका अनुसार अब एक चर्चबाट सुरु भएको संक्रमण दक्षिण कोरियाका सबै १७ प्रान्तमा फैलिइसकेको छ । 

अनि प्रत्येक दिन दक्षिण कोरियामा १ सयभन्दा धेरै संक्रमित भेटिन थालेका छन् ।

संक्रमितका सबैभन्दा धेरै संख्या राजधानी सोलको आसपास भेटिएका छन् । 

अर्कोतिर, कोरोनाभाइरसलाई एक षडयन्त्रका रुपमा त्यहाँको चर्चले भनिरहेको छ । यसले गर्दा कोरियामा थप संक्रमित भेटिने अनुमान गर्न थालिएको छ । पछिल्लो समय युवाहरुमा बढी कोरोना संक्रमण देखिएको छ ।