भारत अमेरिकापछि सबैभन्दा धेरै कोरोनाभाइरसका संक्रमित भएको मुलुक बनेको छ । यसअघि दक्षिण अमेरिकी मुलुक ब्राजिल दोस्रो स्थानमा थियो । 

ब्राजिललाई उछिन्दै भारत धेरै संक्रमित भएको दोस्रो देशमा उक्लिएको हो । अब भारतभन्दा अगाडि अमेरिका मात्र छ ।

भारत सरकारले निरन्तर अर्थतन्त्रलाई चलायमान बनाउन भन्दै सबै प्रतिबन्ध खुलाउँदै गएकाले भारतमा कोरोनाको संक्रमण झन् बढ्दै गएको हो । 

भारतमा सोमबार मात्रै ९० हजारभन्दा बढी संक्रमित थपिएका छन् । कुल संक्रमितको संख्या ४२ लाख नाघेको छ । 

अहिलेकै दरमा संक्रमण बढ्दै जाने हो भने भारतले अर्को महिना अमेरिकालाई पनि उछिन्न सक्ने सम्भावना रहेको विज्ञहरूले चेतावनी दिएका छन् । अमेरिकामा अहिले ६४ लाख ६४ हजार बढी संक्रमित छन् ।