असारको अन्तिमतिर जब प्रहरी प्रमुखमा शैलेश थापा क्षेत्री नियुक्त गर्ने निर्णय मन्त्रिपरिषद्ले गर्‍यो, तब प्रहरी प्रशासनमा एउटा खुसी छायो– स्वच्छ छविका थापाले अब प्रहरी प्रशासनमा आमूल परिवर्तन ल्याउने छन् । 

तर, आइजिपी भएको केही महिनामा नै आइजिपी थापाको अकर्मण्यता र उनले गरिरहेका ‘तिकडम’को खुलासा हुँदै गएको छ ।

यसैको सिलसिला हो, उनी प्रहरी प्रमुख भएर आएपछि प्रहरीका विभिन्न नेतृत्वमा पुगेका ‘थापा’हरुको समूह ।

प्रहरी महानिरीक्षकको पद सम्हालेपछि आइजिपी थापाले आफूसँग थर मिल्नेहरुलाई पहिलो प्राथमिकतामा राखेका छन् । ‘त्यति मात्र होइन, आफूलाई आइजिपी बनाउन भूमिका खेल्नेहरुलाई पनि उहाँले प्राथमिकतामा राख्न थालेको देखिएको छ,’ थापासँगै निकट एक प्रहरी अधिकारी बताउँछन् ।

पछिल्लो समय प्रहरी हेडक्वार्टरमा समेत थापाले थापाहरुलाई प्राथमिकता दिन थालेको गाइँगुइँ चल्न थालेको छ । 

यसका केही उदाहरणहरु हेरौँ  ।

असारको अन्तिम साता आइजिपी भएलगत्तै शैलेश थापाले आफ्नो सचिवालयमा नियुक्ति गरे, रमेश थापा । एसपी रमेश थापा प्रधानमन्त्री केपी शर्मा ओलीनिकट मानिन्छन् । ओलीनिकट भक्तपुरका सांसद महेश बस्नेतसँग राम्रो सम्बन्ध भएका एसपी थापाले बस्नेतकै च्यानलबाट ओलीसँग सम्बन्ध बढाएका हुन् ।

प्रधानमन्त्री ओली र सांसद महेश बस्नेतसँग नजिक आइजिपी थापाले यही कारण पनि एसपी रमेश थापालाई आफ्नो सचिवालयमा नियुक्त गरेका हुन् ।

महानगरीय अपराध महाशाखामा दीपक थापा, नेपाल प्रहरीको अनुसन्धान ब्यूरोमा सिआइबीमा सहकुल थापा तथा भक्तपुरमा प्रहरी प्रमुखको जिम्मेवारीमा तारा थापा पुग्नु एउटा संयोग मात्रै हो भन्न सकिने अवस्था छैन ।

अझ अचम्मको नेक्सस त के भने तारा थापा आइजिपी शैलेश थापाको सचिवालयका एसपी रमेश थापाकी श्रीमती हुन् । 

‘आइजिपी साब इमान्दार व्यक्ति हो, उहाँको इमान्दार छवि त छँदै छ,’ नेपाल प्रहरीकै एक उच्च तहका अधिकारी बताउँछन्, ‘तर, पछिल्लो समय उहाँबाट निर्देशित नियुक्तिहरुमा थापाहरुको वर्चश्व देखिँदा उहाँको नेतृत्वमाथि प्रश्न उठेको छ ।’

तर, यो दाबी र तथ्यलाई स्वीकार गर्न तयार छैनन् प्रहरी प्रवक्ता कुबेर कडायत । फरकधारले आइजिपी थापाले त जताततै थापा नै ल्याउनु भएको रहेछ भन्ने प्रश्न गर्दा प्रवक्ता कडायतले भने, ‘त्यस्तो होइन, प्रहरीमा थर हेरेर त्यस्तो गरिँदैन । जो सबल र सक्षम हुनुहुन्छ, मापदण्डको आधारमा नै उहाँहरुलाई जिम्मेवारी दिइएको हो ।’ 

त्यसो त पछिल्लो समय आइजिपी थापाको नेतृत्वमाथि प्रहरी संगठनभित्रै प्रश्न उठ्न थालेको छ । फरकधारमा यसअघि थापा र प्रधानमन्त्रीबीच ३ महिनाभन्दा कम समयमा नै ४० पटकभन्दा बढी भेटघाट भएको समाचार प्रकाशित भइसकेको छ । त्यस्तै, सरकारले संविधान दिवसका दिनमा दिएको पदकमा प्रहरी संगठनबाट आइजिपीले सिफारिस गरेभन्दा धेरैलाई पदक दिइएको छ । यस्ता प्रसंगले आइजिपी शैलेश थापा क्षेत्रीमाथि प्रहरी मुख्यालयमा नै प्रश्न उठ्न थालेको छ ।