कोरोना महामारीका कारण लामो समयदेखि बन्द रहेका भारतको राजधानी नयाँ दिल्लीका विद्यालयहरू यस महिनाको अन्त्यसम्म बन्द रहने दिल्लीका उपमुख्यमन्त्री मनीष सिसोडियाले आइतबार बताएका छन् । 

‘दिल्लीमा विद्यालयहरू बन्द राख्ने निर्णयलाई थपिएको छ । मैले दिल्लीमा सबै विद्यालयहरू अक्टोबर ३१ सम्म बन्द गर्ने निर्देशन जारी गरेको छु । यसबारेको आदेश चाँडै जारी गरिनेछ,’ सिसोडियालाई भारतको राष्ट्रिय दैनिक हिन्दुस्तान टाइम्सले उद्धृत गरेको छ ।

यो घोषणा भारतमा शैक्षिक संस्थाहरूलाई सोमबारदेखि आंशिक भए पनि खोल्ने भनी गरिएका हल्ला र अनुमानबीच आएको हो । 

यस पहिलेको निर्देशनमा महामारीका कारण नयाँ दिल्लीमा विद्यालयहरूलाई अक्टोबर ५ सम्म बन्द गर्ने उल्लेख गरिएको थियो । 

संघीय सरकारले गत सेप्टेम्बर ३० मा कोरोनाको लकडाउनलाई थप खुला गर्नका लागि नियमहरू सार्वजनिक गरिएको थियो । 

यद्यपि विद्यार्थीहरूले अनलाइन कक्षाहरूमा सामेल हुन चाहेमा उनीहरूलाई यसका लागि अनुमति दिइएको छ । विद्यार्थीको हाजिरका लागि बाध्य पार्न नपाइने र अविभावकको सल्लाहमा अनलाइन कक्षामा सहभागिता गराउन सकिने सरकारी निर्देशनमा उल्लेख छ ।

विश्वमा कोरोनाका कारण दोस्रो बढी प्रभावित भारतमा दिल्ली छैटौं बढी प्रभावित राज्य हो । दिल्लीमा अहिलेसम्म २ लाख ८७ हजार ९३० व्यक्ति कोभिड सङ्क्रमित भएकोमा ५ हजार ४७२ व्यक्तिको मृत्यु भएको छ । 

आइतबारको तथ्याङ्क अनुसार भारतमा कुल ६५ लाख ४९ हजार ३७३ व्यक्ति कोरोना सङ्क्रमित भएका छन् भने १ लाख १ हजार ७८२ जनाको मृत्यु भएको छ ।