नेपालमा केही दिन यता दैनिक सयौँ कोरोनाभाइरस संक्रमित थपिएका छन् । त्यस्तै केही दिन यता कोरोनाका कारण नेपालमा ज्यान गुमाउनेको संख्या पनि बढ्दो छ ।
अब नेपालमा कोरोना संक्रमितको संख्याको हिसाबमा ३ हजारभन्दा बढी भएका जिल्ला ८ वटा पुगेका छन् ।
नेपालमा अहिलेसम्म सबैभन्दा धेरै कोरोनाभाइरस संक्रमित भेटिएको जिल्ला काठमाडौं हो । मंगलबारसम्मको तथ्यांक हेर्दा काठमाडौंमा मात्र नेपालका ३० प्रतिशत हाराहारीमा कोरोना संक्रमित भेटिएका छन् । नेपालमा अहिलेसम्म सबैभन्दा धेरै कोरोना संक्रमितले ज्यान गुमाएको जिल्ला पनि काठमाडौं नै हो ।
स्वास्थ्य मन्त्रालयको तथ्यांकअनुसार काठमाडौंमा ३५ हजार ६ सय ३४ जना कोरोना संक्रमित भेटिएका छन् । त्यस्तै, काठमाडौंमा अहिलेसम्म कम्तिमा पनि १ सय ३६ जनाले कोरोनाका कारण ज्यान गुमाएका छन् ।
काठमाडौंपछि नेपालमा सबैभन्दा धेरै कोरोना संक्रमित भएको जिल्ला हो, मोरङ । मोरङमा अहिलेसम्म ५ हजार ३ सय ३ जना कोरोना संक्रमित भेटिएका छन् । मोरङमा कोरोनाका कारण ज्यान गुमाउनेको संख्या ३९ रहेको स्वास्थ्य तथा जनसंख्या मन्त्रालयले जनाएको छ ।
यसपछि ललितपुरमा अहिलेसम्म ४ हजार ९ सय ३५ जना कोरोनाभाइरस संक्रमित भेटिएका छन् । ललितपुरमा कोरोनाका कारण ज्यान गुमाउनेको संख्या ३८ पुगेको छ ।
नेपालमा तीन हजारभन्दा धेरै कोरोना संक्रमित भेटिएका अरु जिल्ला चाहिँ रुपन्देही (३९७१), भक्तपुर (३५००), सुनसरी (३२६६), चितवन (३१२०) र कैलाली (३०२३) रहेका छन् ।
यीमध्ये कैलालीमा बाहेक अरु सबै जिल्लामा ३० जनाभन्दा बढीले कोरोनाका कारण ज्यान गुमाएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।