प्रहरी जवानको समेत तस्करद्वारा विभत्स हत्या
फरकधार / ४ कात्तिक, २०७७

प्रहरी सहायक निरीक्षक गोविन्द विकसँगै बेपत्ता रहेका कैलालीको धनगढी उपहानगरपालिका–१२ जुगेडा अस्थायी प्रहरी चौकीमा कार्यरत प्रहरी जवान रामबहादुर साउदको पनि तस्करले विभत्स तरिकाले हत्या गरेको खुलेको छ ।

साउदको घाटीमा धारिलो हतियार प्रहार गरी हत्या गरेको देखिएको प्रहरीले जनाएको छ । सुदूरपश्चिम प्रदेश प्रहरी कार्यालयका प्रवक्ता प्रहरी वरिष्ठ उपरीक्षक मुकेशकुमार सिंहले साउदको धारिलो हतियार प्रयोग गरी हत्या गरेको देखिएको जानकारी दिए ।

कात्तिक एक गते राति अस्थायी प्रहरी पोस्टका इन्चार्ज प्रहरी सहायक निरीक्षक विकसँगै साउद पनि नियमित गस्तीमा खटिएका थिए । प्रहरी सहायक निरीक्षककको शव आइतबार बिहान नेपाल–भारत सीमास्थित धनगढी उपमहानगरपालिका वडा नम्बर १० को मोहना नदीमा फेला परेको थियो । साउदको अवस्था भने अज्ञात रहेको थियो ।

प्रहरीले हत्याको आशंकाका आधारमा पक्राउ परेका व्यक्तिहरूको बयानको आधारमा साउदको शव फेला पारेको हो । प्रहरी सहायक निरीक्षक विक भेटिएको स्थानदेखि २ सय मिटर टाढा साउदको शव मंगलबार बिहान भेटिएको हो । यसैबीच दुवै प्रहरीको हत्यामा संलग्न आपराधिक गिरोहलाई प्रहरीले पक्राउ गरिसकेको जानकारी दिएको छ ।

प्रहरी स्रोतका अनुसार पक्राउ परेका १६ जनामध्ये केहीले हत्या गरेको स्वीकार गरिसकेका छन् भने केही व्यक्तिहरू अझै भागिरहेकाले खोजी जारी छ । प्रहरीको प्रारम्भिक अनुसन्धान अनुसार घटनास्थलमा दुईवटा तस्कर समूहले प्रहरीको हत्या गरेको खुलेको छ ।

‘पहिला भेटिएको तस्करको समूहले प्रहरीमाथि आक्रमण गरेको र असई विकको हत्या गरी नदीमा शव फाल्यो, त्यसपछि आएको अर्को तस्करको समूहले बाटोमै जवानको शव भेटेको र त्यसलाई पनि नदीको बीचमा गाढेको जस्तो देखिन्छ,’ एकजना प्रहरी अधिकृतले भने । 

उनीहरूले तस्करीको सामान बरामद गर्न खोजेपछि प्रहरीमाथि हमला गरी हत्या गरेको प्रहरी समक्ष बयानका क्रममा स्वीकार गरेको स्रोतको भनाइ छ । खेतमा घेराबन्दीमा पारी हत्या गरेर दुवै प्रहरीलाई नदीमा बगाउने उद्देश्यले फालिएको पक्राउ परेकोहरूले बयान दिएका छन् ।

हत्या गरिएको जुगेडा क्षेत्र प्रदेशको सदरमुकाम धनगढी भएर सुदूरपश्चिमका ९ वटै जिल्लाका लागि सामान तस्करी हुने स्थान मानिन्छ । त्यहाँ नेपाल र भारतका तस्करहरू राति हतियारसहित तस्करी गर्ने गरेको स्थानीयले बताएका छन् । 

अस्थायी प्रहरी चौकी धनगढी उपमहानगरपालिकाको वडा नम्बर १२ मा राखिएको छ भने त्यो चौकीले धनगढीको वडा नम्बर ९, १० र १२ को सीमा क्षेत्र हेर्नुपर्छ । 

अहिले नेपालबाट, मटरको भारी मात्रामा भारततिर तस्करी भइरहेको छ । नेपालमा चाइनाको मटर आउने र त्यो मटर भारत तस्करी हुने गरेको हो । भारतले मटर आयातमा प्रतिबन्ध लगाएको छ । भारतको भन्दा आधा मूल्यमा चीनको मटर पर्ने भएकाले तस्करी बढेको हो । मुठभेड भएको स्थलमा केही मटर पनि खसेकाले, नेपालबाट मटरको तस्करी गर्नेहरूको हत्यामा संलग्नता हुनसक्ने प्रहरीले अनुमान छ ।

सबैसँग सहजै मिल्ने स्वभाव थियो साउदमा

अछामको बान्नीगढी जयगढ गाउँपालिकामा जन्मिएका साउद विसं २०६५ मा दिपायलबाट प्रहरी सेवामा प्रवेश गरेका हुन् । जवान साउद सबैसँग सजिलैसँग मिल्न सक्ने खुवी भएका थिए । साउद उनका पाँच भाइ मध्येका साहिँला हुन् ।

उनी जिल्ला प्रहरी कार्यालय कैलाली आएको करिब ३ वर्ष भएको थियो । त्यहाँबाट जुगेडा अस्थायी प्रहरी पोस्टमा गएको अढाई वर्ष भएको अस्थायी प्रहरी पोस्ट जुगेडामा कार्यरत एक प्रहरीले बताए । उनले साउद इमान्दार र सबैसँग मिल्ने स्वभावका व्यक्ति रहेको बताए ।

उनका श्रीमती र २ छोरी छन् । शनिबार साँझ घटना भए पनि साउदको परिवार भने सोमबार दिउँसो मात्रै धनगढी पुगेको थियो । शनिबार जुगेडा अस्थायी प्रहरी पोस्टबाट असई विक र जवान साउद बा५८प ५२८४ नम्बरको मोटरसाइकल लिएर गस्तीमा गएका बेला सम्पर्कविहीन भएका थिए ।

सँगै गएका असई विकको धनगढी उपमहानगरपालिका–१० स्थित तस्करीको ट्रान्जिट प्वाइन्ट मानिने (गोठान) मोहना नदीको बीचमा हत्या गरिएको अवस्थामा शव आइतबार बिहान ५ बजे फेला परेको थियो । 

असई विकको मोबाइल भने सशस्त्रको गोताखोर टोलीले मोहना नदीको बीचमा फेला पारेको थियो ।

  • प्रकाशित मिति : कात्तिक ४, २०७७ मंगलबार १४:७:१७,  

फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक , ट्विटरमा, युट्युब पनि जोडिन सक्नुहुन्छ ।


यस विषयसँग सम्बन्धित समाचार

यो सामग्री सेयर गर्नुहोस्


यो पनि नछुटाउनुहोस्
मल्टिमिडिया