भियतनाममा व्यापक वर्षाका कारण बाढी र पहिरो जाँदा कम्तीमा ११४ जनाको मृत्यु हुनुको साथै कम्तीमा २१ व्यक्ति बेपत्ता भएका भियतनामको प्राकृतिक प्रकोप रोकथाम तथा नियन्त्रण केन्द्रीय परिचालन समितिले बिहीबार जनाएको छ ।

राज्यको क्वाङ ट्रि, थुवा थिएन ह्यु, क्वाङ नाम लगायतका प्रान्तमा गत साताको अन्तमा परेको वर्षाका कारण कम्तीमा ५९ हजार ३०० घर परिवारका २ लाख ६ हजार ८०० व्यक्तिलाई सुरक्षित स्थलमा सारिएको छ ।

हा तिन्ह र क्वाङ न्हि प्रान्तमा कम्तीमा ४६ हजार ८०० घरहरू डुबानमा परेका र कम्तीमा ६ लाख ९१ हजार १०० चौपाया मरेका वा बाढीले बगाएका बताइएको छ ।

भियतनामको उद्योग तथा व्यापार मन्त्रालयका अनुसार विस्थापितलाई पुनः स्थापनाका कामहरू थालिसकिएको छ भने व्यावसायिक अनियमितता हुन नदिन अनुगमनलाई कडा पारिएको छ ।

मौसम विज्ञान विभागले हा तिन्ह, क्वाङ विन्ह, क्वाङ त्री र थुवा थेन हुवा क्षेत्रमा अझै पहिरो र डुबानको उच्च जोखिम रहेको चेतावनी दिएको छ ।