भारतीय जासुसी संस्था रअ प्रमुख सामन्तकुमार गोयललाई भेटेपछि प्रधानमन्त्री केपी शर्मा ओली नरम हुन थालेको भारतीय मिडियाले टिप्पणी गरेका छन् । केही दिन अघि भएको यो भेटबारे अहिले पनि नेपालमा प्रधानमन्त्री ओलीको आलोचना भइरहेको छ । 

यहीबीच भारतीय मिडियामा चाहिँ ओली अब नरम बनेको बताउन थालेका छन् । भारतीय मिडिया लाइभहिन्दुस्तानडटकममा प्रकाशित एक सामग्रीमा त प्रधानमन्त्री ओलीले दिएको दशैंको शुभकामनामा नेपालको नयाँ नक्सा नसमेटिनु यसैको कारण भएको उल्लेख गरिएको छ । 

उक्त समाचारमा भारतले नेपालले जारी गरेको नयाँ नक्सालाई पहिले देखि नै अस्वीकार गर्दै आएको र अब नेपाली प्रधानमन्त्रीले नै उक्त नक्सा नभएको तस्वीर सार्वजनिक गर्नुले उनी नरम भएको प्रमाण दिएको उल्लेख गरिएको छ ।

गोयलसँगको यो भेटपछि नेपाल भारत सीमा विवादको समाधान निस्किने पनि भारतीय मिडियामा उल्लेख गरिएको छ ।