गण्डकी प्रदेश ट्राफिक प्रहरी कार्यालय पोखराले राजमार्ग तथा शहरी क्षेत्रमा सञ्चालन हुने गरी ‘चालकसँग १ मिनेट’ कार्यक्रम सुरु गरेको छ । सवारी दुर्घटनाको जोखिम न्यूनीकरणका लागि सचेतनामूलक कार्यक्रम सुरु गरेको गण्डकी प्रदेशका ट्राफिक प्रमुख प्रभु ढकालले बताए ।

एसपी ढकालका अनुसार कोरोना महामारीको कुरालाई समेत मध्यनजर गर्दै कोरोना संक्रमणबाट बच्ने, बचाउने उद्देश्यले आइतबार बिहान ११ बजेबाट गण्डकी प्रदेशको ११ वटै जिल्लामा रहेको ११ वटा जिल्ला ट्राफिक प्रहरी कार्यालय र ५३ वटा अस्थाई ट्राफिक पोष्टले ‘चालकसँग १ मिनेट’ कार्यक्रम शुरु गरेको हो । 

खराब मौसमका कारण दुर्घटना हुने सक्ने कुरालाई मध्यनजर गर्दै सचेतनामूलक सन्देश दिनका लागि यस कार्यक्रम सुरु गरिएको एसपी ढकालको भनाइ छ । ‘चालकसँग १ मिनेट’ कार्यक्रम एक महिनासम्म दिनहुँ सञ्चालन हुने बताइएको छ । 

सवारी चलाउँदा अनिवार्य रुपमा सिट बेल्ट लगाऔँ, मोटरसाइकल र स्कुटर चालकले हेल्मट र हेल्मेटको फिता अनिवार्य लगाऔँ, मापसे तथा नसाजन्य पदार्थ सेवन गरी सवारीसाधन नचलाऔँ र तिब्र गतिमा सवारी नचलाऔँभन्दै कार्यक्रममार्फत सचेतना फैलाइने बताइएको छ ।