सत्तारुढ नेपाल कम्युनिस्ट पार्टी (नेकपा) का अध्यक्ष एवं प्रधानमन्त्री केपी शर्मा ओलीले दुवै पदबाट नहट्ने बताएका छन् ।
संखुवासभाको किमाथांका पुगेका ओलीले पत्रकारहरुसँग कुरा गर्दै पार्टी अध्यक्ष र प्रधानमन्त्री दुवै पदबाट नहट्ने बताएका हुन् । आफू पाँच वर्षका लागि जनमत प्राप्त प्रधानमन्त्री भएको भन्दै उनले बीचैमा राजीनामा दिन नमिल्ने बताए । उनले भने, ‘जनताले पाँच वर्षका लागि जनमत दिएको छ, अब बीचैमा छोड्ने कुरा हुन्न । हल्लाको पछि नलाग्नुहोस् ।'
पत्रपत्रिकाले बिहानैदेखि राजीनामा दिँदैछ, बेलुकी राजीनामा दिँदैछ भनेर लेखेको भन्दै प्रधानमन्त्री ओलीले पत्रकारहरुसँग असन्तुष्टि समेत व्यक्त गरे । उनले भने, 'मैले पत्रकारहरुलाई राजीनामा दिनुपर्ने हो ?’
आफू महाधिवेशनबाट निर्वाचित भएको बताउँदै उनले अध्यक्ष छोड्न पनि प्रक्रिया पूरा गर्नुपर्ने बताए । ‘कसैको चाहना होला, तर चाहना छ भन्दैमा मैले छोड्न मिल्दैन’, उनले भने ।
पार्टीभित्र अहिले बढेको आन्तरिक विवादले पार्टी विभाजनसम्म नपुग्ने ओलीले बताए ।
बुधबार किमाथांका पुगेका प्रधानमन्त्री ओली सशस्त्र प्रहरीको बिओपीको निरीक्षण, कोसी करिडोर र अरुण तेस्रो जलविद्युत आयोजनाबारे जानकारी लिएर आजै काठमाडौं फर्किएका हुन् । प्रधानमन्त्रीसँगै मुख्यमन्त्री शेरधन राई, राष्ट्रियसभा सदस्य परशुराम मेघी गुरुङलगायत नेताहरु पनि किमाथांका पुगेका थिए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
