अमेरिकाका नवनिर्वाचित राष्ट्रपति जो बाइडेनले आफ्नो सिनियर प्रेस टिममा महिलाहरुलाई मात्र राखेका छन् । 

अमेरिकी इतिहासमा राष्ट्रपतिको प्रेस टिममा सबै महिला भएको यो पहिलो पटक हो । 

यो टिमको नेतृत्व केट बेडिंगफिल्डले गर्दैछिन् । उनी बाइडेनको चुनावी अभियानदेखि बाइडेनसँग जोडिएकी हुन् । त्यति बेला उनलाई उपप्रमुखको जिम्मेवारी बाइडेनले दिएका थिए ।
 

बाइडेनको प्रेस सचिव चाहिँ राष्ट्रपति बाराक ओबामाको कार्यकालमा ह्वाइट हाउसमा कम्युनिकेसन निर्देशक रहेकी जेन साकी हुनेछिन् । 

आफ्नो सचिवालयमा विविधता देखिने बाइडेनले यसअघि नै दाबी गरेका थिए । 

‘मलाई गर्व लागेको छ, ह्वाइट हाउसमा सबै सिनियर कम्युनिकेसन टिम महिलाको हुनेछन्,’ बाइडेनले भनेका छन्, ‘यसले हाम्रो देशको विविधता पनि झल्काउने छ ।’

बाइडेनले २० जनवरीमा राष्ट्रपति पदको सपथ लिँदैछन् ।