निजीक्षेत्रको लगानीमा निर्माण हुन लागेको नेपालकै ठूलो १६० मेगावाटको लाप्चे खोला जलविद्युत् आयोजनाको वित्तीय व्यवस्थापन भएको छ ।
२६ अर्ब २० करोड लागत अनुमान गरिएको उक्त आयोजनामा नेपाल बैंकको अगुवाइमा विभिन्न नौ बैंक तथा वित्तीय संस्थाले लगानी गर्ने भएका छन् । आयोजनामा सहवित्तीयकरणमार्फत १९ अर्ब ६५ करोडभन्दा बढी लगानी गर्नेसम्बन्धी सम्झौता भएको छ ।
आयोजनाका तर्फबाट नासा हाइड्रोपावरका अध्यक्ष मोतिलाल दुगड तथा बैंकहरुको तर्फबाट नेपाल बैंकका प्रमुख कार्यकारी अधिकृत कृष्णबहादुर अधिकारीले लगानीसम्बन्धी सम्झौतापत्रमा हस्ताक्षर गरे ।
उक्त आयोजनामा नेपाल बैंकले ५ अर्ब, नेपाल इन्भेस्टमेन्ट बैंकले ३ अर्ब ५० करोड, कर्मचारी संचयकोषले २ अर्ब, राष्ट्रिय बाणिज्य बैंकले २ अर्ब, हिमालयन बैंकले २ अर्ब, लक्ष्मी बैंकले १ अर्ब ८८ करोड २५ लाख, नेपाल एसबिआई बैंकले १ अर्ब, बैंक अफ काठमाण्डूले १ अर्ब तथा कृषि बिकास बैंकले १ अर्ब गरी १९ अर्ब ६५ करोड २५ लाख रुपैयाँ लगानी गर्ने भएका हुन् ।
आयोजनाबाट २०७९ साउनसम्ममा उत्पादन सुुरु गरिने जानकारी कार्यक्रममा दिइयो ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
