नेपाल राष्ट्र बैंकले अनलाइनमार्फत निश्चित रकमको सीमा तोकी विदेशी वस्तु तथा सेवा आयात गरी भुक्तानी गर्न विदेशी मुद्रा सटही सुविधा उपलब्ध गराउने ब्यवस्था मिलाउने भएको छ ।
यस्तो सटही सुविधा कसरी दिने भनेर प्रारम्भिक मस्यौदा तयार पारेको राष्ट्र बैंकले सम्बन्धित पक्षसँग यसको सुझाव माग गरेको छ । सेवा आयात वापतको विदेशी मुद्राको भुक्तानी गर्न अधिकतम ५ सय अमेरिकी डलर वा त्यो बराबरको अन्य विदेशी मुद्राको प्रिपेड कार्ड जारी गर्ने प्रस्ताव राष्ट्र बैंकले गरको छ ।
यस्तो प्रिपेड कार्ड लिने ब्यक्ति, संस्था वा कम्पनीले बैंक खातामा रहेको नेपाली रूपैयाँलाई सटही गरी त्यस्तो कार्ड पाउने बताइएको छ । यसका लागि सम्बन्धित प्रयोगकर्ताले स्थायी लेखा नम्बर (प्यान) अनिवार्य लिनुपर्नेछ ।
कार्डमा विदेशी मुद्रा जम्मा गर्दा त्यो रकममा विदेशबाट सेवा खरीद गर्दा नियमानुसार लाग्ने कर अग्रिम रूपमा बाणिज्य बैंकले कट्टा गर्नु पर्ने हुन्छ । यस्तो सुविधाबापत एक वर्षमा बढीमा ५ सय डलरमात्र पाइनेछ ।
कुनै व्यवसायीले ५ सय डलर साटेर त्यसको दोब्बर आम्दानी गरेको प्रमाण पेस गरेमा प्रिपेड कार्डमा थप रकम जम्मा गर्ने सुविधा पाउनेछ । प्रिपेड कार्ड लिने ग्राहकले अर्को बैंकबाट मैले यस्तो सेवा लिएको छैन भनेर स्वघोषणा गर्नु पर्ने हुन्छ ।
एकभन्दा बढी बैंकबाट यस्तो कार्ड जारी गरेको पाइएमा मुद्रा अपचलनको मुद्दा लाग्ने राष्ट्र बैंकले बताएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
