वीरगञ्जस्थित नेसनल मेडिकल कलेजले परीक्षाबाट वञ्चित गराएका दुई विद्यार्थीलाई तत्काल परीक्षा दिन पाउने व्यवस्था गर्न नेवि संघले माग गरेको छ । अतिरिक्त शुल्क नतिरेको भन्दै मेडिकल कलेजले रामजी राम र पंकज रामलाई परीक्षाबाट वञ्चित गराएको थियो । 

नेवि संघका अध्यक्ष राजीव ढुंगानाले मंगलबार विज्ञप्ति निकालेर उनीहरुलाई तत्काल परीक्षा दिने व्यवस्था मिलाउन माग गरेका हुन् । संघले एमबिबिएस तहका विद्यार्थीको भविष्यमाथि खेलबाड गर्ने कलेजलाई कारबाही गर्न पनि माग गरेको छ ।

यसबारे शिक्षा मन्त्रालय, विश्वविद्यालय अनुदान आयोग, चिकित्सा शिक्षा आयोग लगायतलाई समयमै जानकारी गराइएको तर उनीहरुले जिम्मेवारी पूरा नगरेको भन्दै नेवि संघले उनीहरूलाई पनि तत्काल कारबाही गर्न माग गरेको छ।