काठमाडौं : प्रधानमन्त्री केपी शर्मा ओलीले पुष्पकमल दाहाल प्रचण्ड र माधवकुमार नेपालमाथि  कटाक्ष गरेका छन्। नेकपा ओली समूह प्रदेश १ को काठमाडौंमा भएको भेलामा शनिबार बोल्दै प्रधानमन्त्रीले दाहाल-नेपाल समूहमाथि व्यंग्य गरेका छन्।

दाहाल-नेपाल निर्वाचनमा जान डराएको भन्दै ओलीले उनीहरुको ब्रान्ड नै 'हामी यहाँ छौं' भइसकेको भन्दै कटाक्ष गरे। 'केन्द्रीय कमिटी बैठकमा नआएर साथीहरु कहाँ गए भनेको त माइतीघरको सडकतिर पो गएर बसेछन्', उनले भने, 'माइतीघरमा भेट्छु कि भनेर गएको त निर्वाचन आयोगमा पुगिसकेछन्। त्यहाँ पनि छातीमा 'हामी यहाँ छौं' नै टाँसेर पुगेछन्। अब त त्यो उनीहरुको ब्रान्ड नै भइसकेको छ।'

दाहाल-नेपाल निर्वाचनमा जान डराएको भन्दै ओलीले आक्रोश पोखे। 'निर्वाचनबाट आफ्नो हालत के हुन्छ भन्ने उनीहरुले बुझेका छन्', उनले भने, 'त्यही भएर उनीहरु निर्वाचनमा जान डराएका हुन्।'