भारतको अरुणाञ्चल प्रदेशभित्र चीनले एउटा गाउँ नै स्थापना गर्न लागेको दावी भारतमा गरिएको छ । सोमबारबाट भारतीय मिडियाहरुमा यो खरबले निकै चर्चा पाइरहेको छ। 

भारत–चीन सीमाबाट ४.५ किलोमिटरभित्र चीनले करिब १०० वटा घर बनाउन लागेको जानकारी दिइएको छ । अमेरिकाको एक सेटेलाइट कम्पनीले खिचेको तस्वीरको हवला दिँदै भारतीय मिडियाहरुले खबर दिएका छन् । 

एनडीटिभीले दिएको खबर अनुसार अरुणाञ्चल प्रदेशको सुबनसिरी जिल्लामा सारी चू नामको नदीको किनारमा चीनले बस्ती बनाएको हो । 

त्यही स्थानको दुई तस्वीहरु देखाउँदै भारतको जमिनमा चीनले गाउँ नै बसाउन लागेको दावी गरिएको छ । २०१९ मा खिचेको तस्वीरमा कुनै संरचना बनेको नदेखिएको  र पछि २०२० को अन्त्यतिर खिचिएको तस्वीरमा ठूलो संख्यामा घरहरु बनाइएको देखिएको दावी गरिएको छ ।