विगत दुई सातादेखि लगातार बढिरहेको सेयर बजारमा मंगलबार ब्रेक लागेको छ । दिनभरको कारोबारमा साढे पाँच अंकले घटेर २३२६ दशमलव ९० बिन्दुमा रोकिएको बजारमा कारोबार रकम भने साढे सात अर्ब रुपैयाँ पुगेको छ ।

लगानीकर्ताले नाफा बुक गर्न खोज्दा सूचक केही घटे पनि कारोबार रकम भने बढेको छ । मंगलबार ७ अर्ब ४६ करोड रुपैयाँको कारोबार भएको छ । 

मंगलबार व्यापार, फाइनान्स र जीवन बीमा समूहको सूचकमा सुधार देखिए पनि बाँकी समूह सूचकमा  भने गिरावट आएको हो । थोरै सेयर पुँजी भएका फाइनान्समा लगानीकर्ताको आकर्षण बढेको छ ।

जीवन बीमा समुह ५३५ अंकले बढ्दा सबैभन्दा धेरै घट्नेमा भने निर्जीवन बीमा समुह १२४ अंकले घटेको छ ।

बजार ओरालो लाग्दा पनि ७ कम्पनीको सेयर मूल्यमा भने सकारात्मक सर्किट लागेको छ । 

सर्वाधिक रकमको कारोबार गर्ने कम्पनीमा भने नेपाल लाइफ अगाडि छ कम्पनीको करिब ९२ करोड रुपैयाँको सेयर किनबेच भएको छ । 

मंगलवार कारोबारमा आएका २०६ कम्पनीमध्ये ५५ कम्पनीको सेयर मूल्य वृद्धि भएको छ भने ११५ ओटा कम्पनीको सेयर मूल्य घटेको छ । त्यसैगरी ६ कम्पनीको सेयर मूल्य भने स्थिर रहेको छ ।