विधानतः नेपाली कांग्रेसको १४औँ महाधिवेशन आउँदो फागुनमा हुनुपर्ने हो । तर, माघको दोस्रो हप्ता बित्नै लाग्दा पनि त्यसको कुनै छनक छैन । फागुनका लागि महाधिवेशनको घोषणा भए पनि सो समउमा सम्भव नहुने भन्दै कांग्रेसका नेताहरुले नयाँ मिति घोषणा गर्ने बताउँदै आएका छन् । तर, एक महिना मात्रै बाँकी हुँदा पनि नयाँ मिति घोषणा हुन सकेको छैन ।
प्रतिनिधिसभा विघटनपछि झनै त्यो अन्योलमा परेको देखिन्छ । सामान्यतया हरेक चार वर्षमा पार्टीको महाधिवेशन गर्नुपर्ने कांग्रेसको विधानले बताउँछ । असामान्य अवस्थामा महाधिवेशनका लागि थप ६ महिना सम्मको बढी समय लिन सक्ने कानुनी प्रावधान छ ।
त्यही प्रावधानमाथि टेकेर फागुनमा नभ्याए आउँदो भदौभित्र महाधिवेशन गरिसक्ने भनेर कांग्रेसको शीर्ष तहमा छलफल पनि चलेको थियो । सभापति शेरबहादुर देउवाले भदौसम्म लम्ब्याउन खोजे पनि वरिष्ठ नेताहरुले दबाब सिर्जना गर्न थालेपछि आगामी वैशाखदेखि जेठसम्ममा महाधिवेशन सक्ने गरी नर्या कार्यतालिका बनाउने गृहकार्य पछिल्लो समय थालिएको थियो । तर, गत ५ पुसमा प्रधानमन्त्रीको सिफारिसमा राष्ट्रपतिले प्रतिनिधिसभा विघटन गरेर नयाँ निर्वाचनको मिति घोषणा गरेपछि कांग्रेसको उक्त गृहकार्य पनि रोकिएको छ ।
यसअघि कांग्रेसले आगामी फागुनको ७ देखि १० गतेसम्म काठमाडाैंमा महाधिवेशन गर्ने कार्यतालिका बनाएको थियोे । तर, उक्त कार्यतालिकाअनुसार महाधिवेशनको पूर्वतयारीका अन्य काम नसकिएका कारण महाधिवेशनमा अन्योल देखिएको छ ।
कांग्रेस केन्द्रीय सदस्य प्रदीप पौडेल भन्छन्, ‘महाधिवेशनको कार्यतालिकाअनुसार कुनै पनि काम नभएकाले महाधिवेशनको मितिभन्दा पनि अब समग्रमा महाधिवेशन नै कसरी हुन्छ भन्ने प्रश्न पार्टीमा उठेको छ ।’ यसअघिको तालिकाअनुसार अहिलेसम्म कांग्रेसले स्थानीयदेखि प्रदेशसम्मका अधिवेशन सकिइसक्नुपर्ने थियो । तर, क्रियाशील सदस्यता र समायोजनमै समस्या देखिएपछि अन्य काम कार्यतालिकाअनुसार हुन सकेको छैन ।
कांग्रेस केन्द्रीय कार्यालयले सिन्धुपाल्चोक, बारा र सप्तरी गरी तीन जिल्लामा मात्रै समायोजनको काम बाँकी रहेको बताए पनि कांग्रेस स्रोतका अनुसार प्रदेश दुईका कुनै पनि जिल्लामा समायोजनको काम सकिएको छैन । समायोजन सकिइसकेको भनिएका जिल्लामा पनि देउवाइतर समूहले आपत्ति जनाएका छन् ।
गत १३ गते सम्पन्न कांग्रेस केन्द्रीय समिति बैठकपछि ७४ जिल्लामा समायोजनको काम सकिएको जानकारी दिइएको छ । केन्द्रीय समिति बैठकपछि जारी निर्णयमा सिरहा, धनुषा, महोत्तरी, रौतहट, सर्लाही, पर्सा र बाँके जिल्लाको सन्दर्भमा परेको उजुरीमाथि पुनरावेदनको काम सम्बन्धित समितिले गरिरहेको जनाएको छ ।
यद्यपि, सभापति देउवाइतर समूहका नेताहरुले यो विवरणलाई सही मानेका छैनन् । केन्द्रीय सदस्य पौडेलले ४५ जिल्लामा मात्रै समायोजनको काम सकिएको दाबी गरे । उनले समायोजन सकिएका ४५ जिल्लामा पनि विवाद रहेको फरकधारलाई बताए । केन्द्रीय निर्वाचन समितिमार्फत भइरहेको पार्टी समायोजनको काममा शीर्ष तहमै विवाद देखिएको छ । केन्द्रमा विवाद सामसुम पार्ने गरी सभापति पक्षले कार्यतालिका बनाएको, तर तल्लो तहमा आफूअनुकूलका काम हुने गरी त्यसलाई प्रभावित पार्ने गरिएको केन्द्रीय सदस्य पौडेलको आरोप छ । ‘भएका निर्णय कार्यान्वयनमा इमान्दारी देखिएन,’ पौडेलले भने ।
अर्का केन्द्रीय सदस्य नवीन्द्रराज जोशीले पार्टीका पदाधिकारीले नै फागुनको ७ देखि १० गतेसम्मको महाधिवेशनको मिति ल्याएको, तर सो समयमा हुन नसक्ने भएपछि पार्टी नेतृत्वले नै यसको जवाफ दिनुपर्ने उनले बताए । ‘त्यो हामीले वा अरु कुनै नेताले ल्याएको होइन,’ जोशीले फरकधारसँग भने, ‘त्यसबारे सभापतिले जवाफ दिनुपर्ने हुन्छ ।’ पछिल्लो समय सभापति देउवाले वरिष्ठ नेता रामचन्द्र पौडेल र महामन्त्री सशांक कोइरालासँग एक्लाएक्लै भेटेर नयाँ महाधिवेशनको कार्यतालिका र त्यसबारे देखिएका समस्याबारे छलफल गरिरहेको नेताहरुले बताएका छन् ।
अब केन्द्रीय समिति बैठकमार्फत वर्तमान कार्यसमितिको म्याद बढीमा ६ महिना थप्नुपर्ने हुन्छ । त्यसैअनुसार महाधिवेशनको नयाँ कार्यतालिका ल्याउनुपर्ने कानुनी बाध्यता छ । कांग्रेस प्रवक्ता विश्वप्रकाश शर्माले पार्टीभित्र छलफल गरेर सर्वसम्मत रुपमा महाधिवेशनबारे नयाँ निर्णय लिइने बताएका छन् ।
सभापतिइतर पक्षका नेताहरुले भने सभापति देउवा प्रतिनिधिसभा विघटनको बहाना बनाएर महाधिवेशन आफूअनुकूल बनाउन खोजेको आरोप लगाएका छन् । सर्वोच्चले संसद विघटनलाई सदर गरेमा आगामी निर्वाचनलाई देखाएर देउवाले कर्मकाण्डी महाधिवेशन गर्न सक्ने उनीहरुको आशंका छ । प्रतिनिधिसभा पुनस्र्थापना भएको खण्डमा पनि सत्तामा सहयात्रा गरेर महाधिवेशन प्रभावित गर्ने दाउमा देउवा रहेको उनीहरु बताउँछन् । तर, यी दुवै रणनीति सफल नभएमा देउवाले भदौसम्म कार्यकाल लम्ब्याएर कांग्रेसमा वैधानिक संकट निम्त्याउन सक्ने कतिपयको आकलन छ । त्यस्तो वेला पुरानै महाधिवेशन प्रतिनिधिलाई आधार मानेर र वा शीर्ष तहमा सबैलाई बाध्य पारेर आफैँ सर्वसम्मत सभापति बन्न विधान संशोधन गर्ने देउवाको दाउ रहेको बताइन्छ ।
केन्द्रीय सदस्य जोशी कांग्रेसको आत्मा नै तल्लो तहको अधिवेशनमा रहेको भन्दै त्यो प्रक्रियाअनुसार नभएमा कांग्रेस बलियो बन्न नसकिने दाबी गर्छन् । ‘हामीले केन्द्रमा लेनदेनको कुरा गर्छौं,’ जोशीले भने, ‘तर, कांग्रेस बलियाे हुने आधार तल्लो तहको संगठन हो, जसलाई हामीले भत्कायौँ भने हामी कहीँ पनि रहँदैनौँ ।’
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।