म्यानमारमा भएको सैन्य ‘कु’को विरोधमा नेपाल विद्यार्थी संघले ललितपुरमा प्रदर्शन गरेको छ । नेवि संघ पाटन क्याम्पस इकाइको संयोजनमा नेविसंघले ललितपुरमा प्रदर्शन गरेको हो । 

नोभेम्बरमा सम्पन्न निर्वाचनमा आफूसमर्थित दलको पराजय र सुकीको दलले दुई तिहाईभन्दा बढी सिटमा विजय पाएपछि सेनाले सत्ता हातमा लिएको हो । 

म्यानमारमा सोमबार विहानै त्यहाँको प्रजातन्त्रवादी नेतृ आङ साङ सुकी, राष्ट्रपतिलगायत नेतालाई नियन्त्रणमा लिएर सेनाले शक्ति हातमा लिएको छ ।

प्रदर्शनलाई नेवि संघका पूर्वकेन्द्रीय सदस्य लाओसकुमार राईले अगुवाइ गरेका थिए । कार्यक्रममा नेवि संघ पूर्व केन्द्रिय सदस्य राई, पूर्व केन्द्रिय सदस्य अनिल खनाललगायतले सुकीलाई तत्काल रिहा गर्न माग गर्दै निरंकुश शैलीको घोर विरोध जनाए ।