नेपाली कांग्रेसका उपसभापति विमलेन्द्र निधिले मधेसी जनताले कांग्रेसलाई हराएको परिणामका कारण वर्तमान राजनीतिक संकट निम्तिएको बताएका छन् । 

शनिबार नेपाली कांग्रेसका भ्रातृ संगठनद्वारा आयोजित विरोध प्रदर्शनको कोणसभामा बोल्दै उपसभापति निधिले मुलुक प्रतिगमनतर्फ धकेलिनुमा मधेसी जनता पनि दोषी भएको बताएका हुन् । 

आज नेपाली कांग्रेस सत्तामा भएको भए यस्तो अवस्थाको सिर्जना नहुने दाबी गर्दै उनले हजारौँको शहादतबाट प्राप्त भएको उपलब्धि संघीयता र संविधानसमेत समाप्त हुने अवस्थामा पुगिसकेको बताए । केपी शर्मा ओलीजस्ता निरंकुशले आफ्नो पार्टीभित्रको विवादका कारण मुलुकलाई प्रतिगमनतर्फ धकेलेको उनको आरोप थियो । 

मुलुकलाई बचाउन प्रतिनिधि सभा पुनःस्थापना हुनुपर्ने बताउँदै उनले पुनःस्थापना नभए निर्वाचनमा जानुको विकल्प नरहेको बताए । निर्वाचन लोकतान्त्रिक प्रक्रिया भएकाले त्यसबाट कांग्रेस पछि नहट्ने उनको भनाइ थियो ।