पोखरामा सम्पन्न प्रथम मुख्यमन्त्री कप गण्डकी प्रदेशस्तरीय भलिबल  प्रतियोगिताको पुरुष तर्फको उपाधि तनहुँले हात पारेको छ ।

तनहुँले शनिबार पोखरा रंगशालामा सम्पन्न निकै प्रतिस्पर्धात्मक फाइनलमा ३–२ सेटको जित निकालेको हो । पहिलो सेट २५–२३ ले गुमाएको तनहुँले, दोस्रो सेट २५–१७ र तेस्रो सेट २५–२० ले आफ्नो पक्षमा पारेको थियो । चौथो सेट स्याङजाले २५–१३ ले जितेपछि खेल पाँचौं सेटसम्म पुग्यो । 

पाँचौँ तथा अन्तिम खेल १५–१० ले आफ्नो पक्षमा पार्दै तनहुँले उपाधिमाथि कब्जा जमाएको हो ।

प्रतियोगिताको विजेता बनेको तनहुँले २ लाख प्राप्त गर्दा उपविजेता बनेको  स्याङजाले १ लाखमा चित्त बुझायो । तेस्रो बनेको पर्वतले ५० हजार पायो । 

कास्की जिल्ला भलिबल संघको आयोजनामा फागुन ४ बाट सुरु भएको प्रतियोगितामा गण्डकी प्रदेशका १० जिल्लाको सहभागिता थियो ।