सर्वोच्च अदालतले प्रतिनिधिसभा विघटन गर्ने सरकारको निर्णयलाई बदर गरेको खुसियालीमा प्रचण्ड–माधव समूहले सुर्खेतमा विजय उत्सव निकालेको छ । बुधबार दिउँसो वीरेन्द्रनगरस्थित मंगलगढी चोकबाट नाचगानसहित निकालिएको र्याली पिपलचौतारा पुगेर सभामा परिणत भएको थियो ।
 
र्यालीमा प्रचण्ड–माधव समूहका नेता तथा कर्णाली प्रदेश सरकारका आन्तरिक मामिला तथा कानुनमन्त्री नरेश भण्डारी, प्रतिनिधिसभा सदस्य ध्रुवकुमार शाही, प्रदेशसभा सदस्यहरु बिन्दमान विष्ट, पद्मा खड्का, गणेशप्रसाद सिंहलगायत नेता तथा कार्यकर्ताको सहभागिता  थियो । निधारमा अबिर, हातमा सूर्य चिह्नसहित सडकमा आएका उनीहरुले जनताको जित भएको बताएका थिए । 

साथै, उनीहरुले प्रधानमन्त्री केपी शर्मा ओलीको राजीनामा मागेका छन् । कार्यक्रममा प्रतिनिधिसभा सदस्य ध्रुवकुमार शाहीले ओलीको असंवैधानिक कदम जनतासामु पतन भएको बताए । प्रतिनिधिसभा विघटन गर्ने सरकारको निर्णय बदर गरेर सर्वोच्चले न्यायको अनुभूति दिएको उनको भनाइ छ ।