सहिद स्मारक ‘बि’ डिभिजन लिग अन्तर्गत सोमबारको दोस्रो खेलमा शीर्ष स्थानको सातदोबाटो युथ क्लब विजयी भएको छ ।

उसले सातदोबाटोस्थित एन्फा कमप्लेक्समा श्री भगवती क्लबमाथि १-० को कठिन जित हात पारेको हो । 

खेलको २५ औं मिनेटमा दोर्जे तामाङले पेनाल्टीमार्फत् गरेको एक मात्र गोल सातदोबाटोका लागि ३ अंक जोड्न पर्याप्त बन्यो । 

श्री भगवती क्लबका खेलाडीले डिबक्सभित्र ह्यान्ड गरेपछि सातदोबाटोले पेनाल्टीको अवसर पाएको थियो । 

जितसँगै सातदोबाटोले ८ खेलबाट २२ अंक जोड्दा पराजित श्री भगवतीको समान खेलबाट ६ अंक छ ।  

लिग अन्तर्गत आज नै भएको पहिलो खेलमा रानीपोखरी कर्नर टिम (आरसिटी) ले टुसाल युथ क्लबमाथि १–० को कठिन जित हात पार्‍यो आरसिटीको जितमा एक मात्र गोल अजित गुरुङले गरे ।  

यो जितसँगै आरसिटीले ८ खेलबाट १२ अंक जोड्दा पराजित टुसालको समान खेलबाट ८ अंक छ ।