भारतीय आयल कर्पोरेसनले पेट्रोलियम पदार्थको मूल्य फेरि बढाएर पठाएपछि नेपालमा पनि मूल्य बढाउने तयारी गरेको छ । निगम स्रोतले आजै रातिदेखि नै बढाउने तयारी गरेको जानकारी दिएको छ । 

आइओसीले आज (सोमबार)देखि लागू हुने गरी मूल्य बढाएर पठाएको हो । नेपाल आयल निगम र भारतीय आयल कर्पोरेसनबीचको सहमतिअनुसार आइओसीले मूल्य बढाएको हो ।  

आइओसीको मूल्यसूचीअनुसार प्रतिलिटर पेट्रोलमा ४ रुपैयाँ २० पैसा, डिजेलमा ४ रुपैयाँ ७ पैसा, मट्टीतेलमा ४ रुपैयाँ ६५ पैसा, हवाई इन्धनमा ४ रुपैयाँ ६ पैसा तथा ग्यासमा प्रतिसिलिन्डर ९१ रुपैयाँ ९६ पैसा बढेको छ ।

हालको मूल्यअनुसार निगमलाई दुई सातामा एक अर्ब ५४ करोड रुपैयाँ घाटा हुने अवस्था रहेको निगमले जनाएको छ । यद्यपि, निगमले खरिद मूल्यअनुसार तेलको मूल्य नबढाउने भएको छ ।